Puukare, Ceerno Seydu Sàll

12.00$

Ci téereem bii, Ceerno Séydu Sàll dafa tàllal askan wi seetu ngir mu janook xar-kanamam, xam moom mooy kan ci dëgg-dëgg, fàttaliku ne lépp lu waay teg sa bopp, yëg metit wu tar, ni ‘’wóoy sama ndey’’, war ngaa xoolaat bala nga koy teg keneen. Ndax jaadu na nit kiy xàwwi sutura moroomam, walla di ko ñàkkal faayda mbaa di ko sosal ? Ku jàng Puukaredinga xam ne li am solo mooy nu àndandoo nekk benn, moytu lépp luy jur fitna, ñeme coono te ragal Yàlla.

JAAR-JAARU CEERNO SÉYDU

Gone, su jàngee ay téere, du ñàkk mu jéem a toppandoo fentaakon yi ko yëngal moom ci boppam, féexal xolam, ubbi xel mi. Moo tax ba muy waxambaane, doon ndongo ca liise Maalig Si bu Cees, la Ceerno Séydu Sàll tàmbalee fonk bind, bëgg ko, di ko bége. Looloo ko may tur tey, muy taalifkat bu siiw Senegaal ak bitim-réew.

Ceerno Sàll a ngi juddoo Xombol ci atum 1958. Ku xam àddina la ndax ba mu wëree réewum Senegaal ay yoon i yoon ngir weccee xalaat ak askanam, dem na Mali ak Burkina Faso jàng fay taalifam, di seet it naka lees mën a lëkkale ladab ak misigu Afrig. Ci atum 1993 la Ceerno jël fafal-naaw Ndakaaru wutali Amerig. Baatam a ngay wéy di riir iniwérsite bu Bloomington ca Indiana ak iniwérsite bu Lafayette. New York, Boston ak Los Angeles tamit ñoo ngiy fàttaliku bu baax doomu-Xombol bi ndax ganeji na leen, amal fay waxtaan yu am solo ciy fentam, xamal leen ni képp ku taxaw ci tànki suufeellàkki Afrig yi, dina ko digaaleek yow ba mu saf sàpp.

Wànte lu jiitu loolu, Ceerno demoon na Frãs, toog fa ñetti at – 1989 ba 1992 – jànkonte faak i jafe-jafe yu tar. Ceerno Séydu Sàll dinay faral di wax sax ne nañ ko toroxale Frãs, dàqe ko fa ni xaj, bokk na ci li koy tax a bind ci kàllaamay Kocc. Waaye li muy mer yépp, jaawalewulaskanu Frãs ak nguuru Frãs. Looloo ko tax ni : ‘’Réew moo dem fekk fa ñu doyadi te iñaan, di la siis. Duma weddi ne ba ma dëkkee Pari, sonal nañ ma fa lool waaye daje naa fa tamit ak nit ñu baax, ñu jàppale ma… Man gëm naa ni askani àddina si yépp dañoo war a déggoo.’’ Loolu la Ceernoy woy ci beneen téereb taalifam, Bouffées poétiques, te ‘’Lettres de Renaissance’,kërug-móolukaay gi Aamadu Elimaan Kan jiite, di ko waaj a génne.

Bu weesoo Senegaal, mënees naa jënd sunuy téere ca Amerig, Meksig, Kanadaa ak Frãs. Ku leen soxla ci réew yi nu limul fii, mën naa jokkook nun